Friday, April 7, 2017

輝山乳業(6863)爆煲, 遼寧省政府撐腰; 沽空機構指中國宏橋(1378)造假

http://hkm.appledaily.com/detail.php?guid=19982026&category_guid=15307&category=&issue=20170407

輝山乳業(6863)爆煲,據《壹週刊》報道,遼寧省政府介入及撐腰要求輝山之債權銀行承諾「不抽貸、不壓貸、不起訴」。這難免令內銀的壞賬憂慮揮之不去。內銀上月底公佈去年業績,壞賬率普遍較第三季回落。

輝山有上市,且股價單日喪跌九成,自然多人關注,但相信只係冰山一角。最近山東爆發危機就顯露更多問題:魏橋集團旗下魏橋紡織(2698)中國宏橋(1378)都延發去年業績,後者被沽空機構指造假齊星集團天信集團亦陷入債務危機。咁大間上市公司都涉嫌造假,斷估有大量非上市民企都係咁,只靠地方政府撐腰至未爆。政府係咪撐得住亦成疑。銀行出名落雨收遮,一旦有銀行call loan,其他銀行都會一窩蜂,結果本來無事嘅企業都出事,造成債務連鎖危機。

早於輝山上市初期,金融圈已盛傳其造假,點解理應最重視風險管理嘅銀行都中招?其實都有銀行睇穿,建行(939)喺2014年收回畀輝山嘅信用額度,指輝山「不僅財務有問題」。奇在去年底渾水(Muddy Waters)唱衰輝山後,平安銀行仍將部份輝山貸款延長一年。諗真啲,平安銀行未必沒警覺,只係深知債仔冇錢還,與其撇賬,不如延長貸款拖住先。

無論係邊種情況,都揭示內銀經營有問題:一係被政府粗暴干預、一係自己風險管理差、一係民企以債冚債已成常態。建行話「不良貸款已見頂」,信不信由你,反正我不信。



No comments: