青心直說：中港股市變造市溫床

青心直說：中港股市變造市溫床

Appledaily.com 胡孟青 2010年07月14日

去年阿爺要振興經濟，自動波放水；今時銀行收水，資金散水，上證綜指由舊年 8月 4日 3478高位，反覆跌至今年 7月 2日低位 2319，足足唔見咗 33%，跌得耐自不然以為利淡盡頭是利好，隨時一個半個理由都可以被視為轉角市抄底博反彈，一而再再而三，股民已被國策挾持，明知阿爺邊有咁容易放生樓市，都一廂情願喪炒一番，總好過一潭死水。

之不過「中國人係要管嘅」，尤其是中國嘅官員更應該受規管，因為佢哋掌握晒關鍵嘅第一手國策內幕，而呢啲消息都係國家機密，足以影響投資市場，有必要小心處理。

官員吹風冇王管
就好似今年 5月 17日，內地媒體爭相報道國家發改委正牽頭相關部委，出台一項更嚴厲房地產調控政策。但《華夏時報》於 22日至引述發改委人士聲明：「此消息純屬張冠李戴。」其間淨係隻雅居樂（ 3383）都跌咗一成。

無獨有偶， 6月 21日發改委又喺網站上發表鄭重聲明，指相關部門人士從未向媒體發表過研究電價調整嘅言論，仲話網路報道不實，但又唔見有人追究失實報道，股民卻已再次因錯估形勢而中伏。

最新一則係自上周已傳得甚囂塵上嘅內房宏調鬆綁傳聞，一時話取消第三套房限貸，唔夠勁就加料嚟多個引述住建部副主任秦虹講話，當中港股民齊歡唱同慶賀之際，至出嚟話人錯誤解讀佢嘅意思。內地咁多部委咁多官員，求其搵個講句都會影響股市，跟傳聞上車唔識快閃，隨時被玩謝冇仇報。

中港股市已經變成一個大賭場，賭政策取向、賭數據、賭中央心意，市場欠內幕就索性有人自製煙幕，直情係市場操控行為，今次見唔少大行分析員急不及待出嚟鬥快叫人上車買中資股。

連中資股大好友摩通都講到明，話幾個主要板塊都有政策風險，大行都睇得咁謹慎，小股民又豈容盲目樂觀。